Kobaxidzedən Gürcüstanda baş verənlərə reaksiya | Buna görə gəncləri qurban verirlər...

“Bəzi müxalifət partiyaları dekabrın 1-i koordinasiya olunmuş zorakılığa açıq şəkildə dəstək verdiklərini bəyan edib. Həmin partiyalar bu hadisələrə görə məsuliyyətdən qaça bilməz”.

Bunu Gürcüstanın Baş naziri yeni hökumətin ilk iclasında bildirib.

O qeyd edib ki, bu proseslərdə siyasətçilərin məsuliyyəti çox böyükdür:

“Onlar, əlbəttə ki, nə ilə məşğul olduqlarını anlayırlar. Ən üzücü olanı onlar insanları, xüsusilə gəncləri çox ciddi cəzalar üçün qurban verirlər. Siz gənclərdən birinin bir polis əməkdaşının sağlamlığına ciddi ziyan vurduğu üçün 7 ilə qədər həbs cəzası ala biləcəyi xəbərini oxudunuz.

Saakaşvili, Qvaramiya, Xazaradze və Qaxariya ilə əlaqəli dörd partiya açıq şəkildə bu koordinasiya olunmuş zorakılığa dəstək verəcəklərini bəyan etdilər. Onlar bütün bunlara görə məsuliyyətdən qaça bilməzlər. Hər kəs bunu nəzərə almalıdır”.

O vurğulayıb ki, son günlər polis çox ağır təhqirlərə və fiziki hücumlara məruz qalıb:

“Hər bir polisin doğru idarəetmədə rolu vacib idi və hər birinə dözümlülüyünə görə təşəkkür edirəm. Biz bu günlərdə polisin yaşadığı bir sıra faktlardan xəbərdarıq. Bunlar ən pis təhqirlər və fiziki hücumlardır, amma nəticədə Daxili İşlər Nazirliyi prosesləri ABŞ və Avropadan daha yüksək səviyyədə idarə etdi. Fransa, Niderland, ABŞ və Almaniyada polislərin nümayişçilərə necə davranmasına dair görüntüləri görmüsünüz”.