Koloniyanı görün nələr xilas edirmiş | Hər kəsi təəccübləndirən hadisə

Cənub-Şərqi Asiyanın tropik meşələrində nadir hallarda rast gəlinən və qeyri-adi qorunma mexanizmi ilə seçilən bir qarışqa növü yaşayır.

"Colobopsis explodens" adlı bu növ koloniyalarını qorumaq üçün öz bədənlərini partlatmaqla həyatlarını qurban verirlər.

Bu qəhrəman qarışqaların davranışlarını və yaşadıqları ekosistemi ətraflı təhlil edən Rutgers Universitetinin təkamül bioloqu Skott Treversin sözlərinə görə, onlar Borneoda, Tailandda və Malayziyada yaşayırlar.

Cəmi bir neçə millimetr uzunluğunda olan bu qarışqalar qırmızımtıl-qəhvəyi rəngdə incə bədən quruluşuna malikdirlər. Hücum zamanı qarışqa öz bədənini parçalayır və sarı rəngli, yapışqan, öldürücü kimyəvi maddələr ehtiva edən maye ifraz edir. Bu mexanizmlə rəqiblər ya zərərsizləşdirilir, ya da öldürülür, koloniyanın digər üzvləri isə xilas olur. Lakin bu müdafiə üsulu qarışqanın həyatı bahasına başa gəlir.

S.Trevers həmçinin vurğulayıb ki, "Colobopsis explodens" növü meşələrdə ən çalışqan və nizamlı qida axtarıcılarından biridir. Bu qarışqaların əsas qida mənbəyi isə həşəratlar tərəfindən ifraz olunan bal, şeh və bitkilərin nektarıdır.