Koreyalı nazir ABŞ-yə xəbərdarlıq etdi

“Koreya yarımadasında nüvə müharibəsi qaçılmazdır”.

Bu fikri Koreya Xalq Demokratik Respublikasının müdafiə naziri Kan Sun Namın adından Şimali Koreyanın Moskvadakı səfirliyinin müdafiə məsələləri üzrə attaşesi general-mayor Kim Yen Zin XI Moskva Beynəlxalq Təhlükəsizlik Konfransının iştirakçılarına müraciətində səsləndirib.

“Artıq Koreya yarımadasında nüvə müharibəsinin olub-olmayacağı müzakirə edilmir. İndi əsas sual bu müharibənin kim tərəfindən və nə vaxt başlayacağı ilə bağlıdır. ABŞ və Cənubi Koreyanın özbaşınalığı Koreya yarımadasını yeni nüvə müharibəsi ocağına çevirir”, – deyə general mayor qeyd edib.

Şimali Koreya tərəfi bildirir ki, təkcə bu il ABŞ regiona nüvə silahı daşıya bilən sualtı qayıq, təyyarədaşıyan və nüvə bombardmançı təyyarə də daxil olmaqla “külli miqdarda strateji silahlar” göndərib.