Kosmosdakı su qalıqları nəyi sübut edir? | Çinli alimlərdən sensasiyalı iddia

Ay Yer planeti ilə Teyva adlandırılan və ölçüləri Mars planeti qədər olan obyektin toqquşması zamanı yaranıb.

Bu cür iddia ilə çinli alimlər çıxış ediblər.

Ayın arxa tərəfindəki süxurlarda anormal dərəcədə aşağı su konsentrasiyası aşkarlanıb. Bu isə onun Yerlə nəhəng bir obyektin toqquşması nəticəsində formalaşdığına dair ehtimalları gücləndirir.

Çin Elmlər Akademiyasının alimləri “Çanye-6” missiyası çərçivəsində Ayın Cənub qütbü – “Eytken” adlı nəhəng krater bölgəsindən toplanmış ay torpağı nümunələrini analiz ediblər. Skan edən elektron mikroskopiya və zond mikrotəhlili metodları ilə müəyyən edilib ki, bu süxurlarda hər qramda cəmi 1-1,5 mikroqram su var. Bu isə Ayın yaxın tərəfindəki 200 mikroqrama çatan göstəricidən xeyli azdır.

Bu tapıntılar Ayın təxminən 4,5 milyard il əvvəl, Yer planetinin Mars ölçüsündə bir cisimlə ‒ “Teyya” adlandırılan obyektlə toqquşması nəticəsində formalaşması hipotezini təsdiqləyir. Həmin toqquşma nəticəsində kosmosa çoxlu miqdarda maddə atılıb və bu maddələr zamanla Ayı formalaşdırıb.

Tədqiqatçılar ehtimal edirlər ki, Yerin peykinin yaranması zamanı baş verən toqquşma nəticəsində “nəmlik” baxımından zəngin olan materialın böyük hissəsi Yerə baxan tərəfə keçmiş ola bilər. Lakin dəqiq nəticələr çıxarmaq üçün Ayın arxa tərəfindəki digər bölgələrdən də əlavə nümunələrə ehtiyac var.