Krım körpüsünə Ukrayna hücum edib?

Ukraynanın Ali Radasında Krım körpüsünə hücumda iştirak edənlərin təltif edilməsi təklif olunub.

Təşəbbüsü Radanın deputatı Oleksiy Qonçarenko irəli sürüb. Onun sözlərinə görə, Krım körpüsünə hücum Ukraynanın böyük uğurudur.

Qeyd edək ki, bundan əvvəl Ukrayna Krım körpüsündə baş verən fövqəladə vəziyyətdə Kiyevin iştirakına işarə edib.

“RBC Ukrayna” nəşri hücumu Ukrayna dəniz qüvvələrinin və kəşfiyyat xidmətinin xüsusi əməliyyatı adlanırıb. Krım parlamentinin rəhbəri Vladimir Konstantinov törədilən terror aktına görə qisas almağa çağırıb.

Rusiya mətbuatında da Krım körpüsünə hücumu Ukraynanın Kəşfiyyat Xidmətinin həyata keçirməsi ilə bağlı iddialar əksini tapıb. BBC-nin rus dili xidmətinin Ukrayna Kəşfiyyat Xidməti daxilindəki mənbəsinə istinadən yaydığı məlumata görə, hücum ölkə donanmasının xüsusi təyinatlıları ilə birgə həyata keçirilib.

Xidmətin mətbuat katibi Andrey Yusov mətbuata açıqlamasında hadisənin səbəbləri barədə fikir bildirməsə də, körpünü lazımsız struktur adlandırıb. O həm də qeyd edib ki, Rusiyanın üzləşdiyi bu kimi çətinliklər Ukrayna müdafiə qüvvələri üçün potensial üstünlüklər yarada bilər.

Qeyd edək ki, artıq Krım körpüsündə dəmiryolu xəttinin fəaliyyəti bərpa olunub və Simferopol-Moskva qatarı Krasnodar diyarına yola düşüb.