Kütləvi həbslərdən sonra Türkiyədə çevriliş təhlükəsi | Ərdoğan rəsmiləri topladı

Türkiyə Prezidenti Rəcəb Tayyib Ərdoğan çevriliş təhlükəsi ilə bağlı informasiyaların yayılmasından sonra təcili iclas keçirib.

Yerli medianın yaydığı məlumata görə, ölkə lideri prezident iqamətgahında Türkiyə Milli Kəşfiyyat Təşkilatının rəhbəri İbrahim Kalın və ədliyyə naziri Yılmaz Tunçla görüşüb. Söhbətin detalları barədə təfərrüatlar açıqlanmayıb.

Məlumat üçün bildirək ki, Türkiyədə son zamanlar kütləvi həbslər başlayıb. Bir müddət əvvəl Ankara Təhlükəsizlik Müdirliyində bir neçə polis saxlanılıb. Onlar “Ayxan Bora Kaplan” adlı cinayətkar qrupla birgə fəaliyyət göstərməkdə ittiham olunurlar.

Çevriliş riski ilə bağlı ilk açıqlamanı isə Milliyyətçi Hərəkat Partiyasının sədri Dövlət Baxçalı verib. O, parlamentdə çıxışı zamanı bildirib ki, ölkədə baş verən hadisələr Ərdoğanın devrilməsi üçün çevrilişə cəhdin olduğunu göstərir. Buna görə də Baxçalı səlahiyyətli şəxslərə səslənərək onları bir neçə polis əməkdaşının işdən çıxarılması ilə kifayətlənməməyə çağırıb.