Kütləvi hücum ölkənin altını üstünə gətirdi | Ukrayna gözləmədiyi zərbələrlə üz-üzə

Rusiya avqustun 28-i gecə saatlarında Ukrayna ərazisinə növbəti dəfə hücuma keçib.

Ukrayna Prezidenti Volodimir Zelenski Rusiyanın Ukraynaya növbəti kütləvi zərbəsi nəticəsində biri uşaq olmaqla azı 8 nəfərin həlak olduğunu bildirib.

Zelenski "Telegram" hesabında qeyd edib ki, dağıntılar altında hələ də insanlar ola bilər. Onlarla xəsarət alan var.

"Rusiyanın bu raketləri və hücumu pilotsuz təyyarələri bu gün dünyada həftələr və aylardır atəşkəs və real diplomatiyaya çağıran hər kəsə aydın cavabdır. Rusiya danışıqlar masasını deyil, ballistikanı seçir", ‒ Zelenski bildirib.

Ukrayna Prezidenti vurğulayıb ki, Rusiya "dünyanın bir hissəsinin" öldürülən uşaqlara göz yummasından istifadə edir. Buna görə də o, baş verənlərə Çindən reaksiya gözlədiyini bildirib: "Axı məhz Çin dəfələrlə müharibənin genişləndirilməməsi və atəşkəs barədə çağırışlar edib".

O, belə qənaətə gəlib ki, Rusiyaya qarşı yeni və sərt sanksiyaların tətbiq edilməsinin vaxtı artıq çatıb, çünki bütün müddətlər artıq bitib və diplomatiya üçün onlarla fürsət məhv edilib.

Ukraynanın daxili işlər naziri İqor Klimenko isə hücumla bağlı bildirib ki, kütləvi hava zərbələri nəticəsində mülki şəxslər həlak olub, 45-dən çox insan yaralanıb. Nazir əlavə edib ki, Kiyevə hava hücumu 9 saatdan çox davam edib.