La Quardiya Hava Limanında baş verən insidentlə bağlı araşdırma aparılır

ABŞ-nin Nyu-York şəhərində yerləşən La Quardiya Beynəlxalq Hava Limanında diqqətçəkən insident baş verib: "Delta Air Lines" aviaşirkətinə məxsus iki sərnişin təyyarəsi uçuş zolağında hərəkət edərkən toqquşub. Baş verən hadisə nəticəsində uçuşa hazırlaşan "CRJ900" tipli təyyarənin qanadı digər təyyarənin füzelyajına toxunaraq zədələyib. İlkin məlumatlara görə, toqquşma nəticəsində pilotlar və sərnişinlər arasında ölüm və ya ciddi xəsarət alan yoxdur, lakin bir təyyarə bələdçisi yüngül xəsarət alıb və ona tibbi yardım göstərilib. Aviaşirkət insident səbəbilə təxirə salınan reysin sərnişinlərini otellərə yerləşdirərək lazımi şəraiti təmin edib. Hava limanının ümumi işi dayanmayıb. Hazırda "Delta Air Lines" hadisənin səbəblərini müəyyənləşdirmək üçün hüquq-mühafizə orqanları ilə birlikdə ətraflı araşdırma aparır.