Lavrov müharibənin bitəcəyi tarixdən danışdı

Rusiyanın xarici işlər naziri Sergey Lavrov Ukraynada xüsusi hərbi əməliyyatın başa çatmasının mümkün vaxtını şərh edib.

“Birinci kanal”a müsahibəsində o bildirib ki, Rusiya tələsmir, nə qədər lazımdırsa, o qədər də vuruşacaq:

“Biz tələsmirik, bu barədə prezident bildirib. Təbii ki, biz Qərbin hazırladığı və nəticədə Ukrayna vasitəsilə bizə qarşı apardığı bu müharibəni tez bir zamanda bitirmək istəyirik. Amma bizim üçün prioritet olan əsgərlərin və döyüş bölgəsində qalan mülki şəxslərin həyatıdır. Biz səbirli xalqıq, əsrlər boyu rus olan vətəndaşlarımızı, torpaqlarımızı müdafiə edəcəyik”.

Qeyd edək ki, Ukraynaya qarşı hərbi əməliyyatlar fevralın 24-də başlayıb. Rusiya Prezidenti Vladimir Putin müharibənin məqsədini “8 il ərzində Kiyev rejimi tərəfindən zorakılığa və soyqırıma məruz qalan insanların müdafiəsi” adlandırıb. Buna cavab olaraq Qərb ölkələri Rusiyaya qarşı genişmiqyaslı sanksiyalar tətbiq edib.