Lavrovdan Ermənistana xəbərdarlıq: Biz bunları görürük

“Rusiya Cənubi Qafqazda NATO maraqlarının Ermənistan vasitəsilə təşviq edildiyinə dair cəhdlər görür”.

Bunu Rusiyanın xarici işlər naziri Sergey Lavrov MDB Xarici İşlər Nazirləri Şurasının iclasının yekunları üzrə jurnalistlərə açıqlamasında deyib.

“Anti-Rusiya əhvali-ruhiyyəsinin qızışdırılmasına gəlincə, bu, müəyyən dərəcədə süni şəkildə həyata keçirilir. Ermənistanda son illər yaradılan qeyri-hökumət təşkilatlarının sayından xəbərimiz var. Bunların sayı əvvəllər də çox idi. Əlbəttə ki, bu təşkilatlar Ermənistanla Rusiya arasında dostluq münasibətlərinin inkişaf etdirilməsi məqsədilə yaradılmayıb. Onlar anti-Rusiya əhvali-ruhiyyəsi üçün zəmin yaratmaq və ilk növbədə ABŞ-nin, Avropa İttifaqının, NATO ölkələrinin maraqlarının Ermənistan vasitəsilə bu regionda təşviqinə hazırlıq görmək məqsədi daşıyır. Biz bu cəhdləri görürük. Onlar bu yolla müəyyən nəticələr də əldə edirlər”, – deyə o qeyd edib.

Lavrov əlavə edib ki, Moskva erməni xalqının böyük əksəriyyətinin Rusiya ilə ənənəvi, tarixi qardaşlıq əlaqələrinin inkişafında maraqlı olduğuna əmindir.