Litva və Polşa fövqəladə vəziyyətə qarşı necə plan hazırlayır? - Baku TV

Litva və Polşanın fövqəladə hallarda əhalinin təxliyəsi üçün birgə mexanizm hazırlaması Baltikyanı regionda təhlükəsizlik narahatlıqlarının artdığını göstərir. Polşanın hava hücumundan müdafiə imkanlarını gücləndirməsi və “Patriot” sistemlərini ölkə ərazisində cəmləşdirməsi də diqqət çəkir.

Politoloq İlqar Vəlizadə hesab edir ki, bu proseslər yalnız Polşa və Litva ilə məhdudlaşmır:

“Hər ehtimala qarşı Polşa, Litva və digər Baltikyanı ölkələr bu tip hazırlıqlar görür. Bu proseslərə daha geniş prizmadan baxmaq lazımdır. Rusiya-Ukrayna müharibəsi Polşa kimi ölkələrə strateji mövqelərini möhkəmləndirmək imkanı yaradır və Polşa bundan maksimum yararlanır”.

Onun sözlərinə görə, Varşavanın əsas hədəfi NATO-nun şərq forpostu rolunu daha da gücləndirməkdir. Polşanın Rusiya, Belarus və Ukrayna ilə sərhədlərinin olması, həmçinin Ukraynaya hərbi təchizat baxımından mühüm mərkəzə çevrilməsi ölkənin strateji əhəmiyyətini artırır.

“Polşa və Litva yaranmış vəziyyətdən istifadə edərək mövqelərini möhkəmləndirir və NATO-nun şərq forpostu rolunu daha effektiv şəkildə həyata keçirməyə çalışır. Eyni zamanda öz müdafiə sistemlərini gücləndirirlər”, – politoloq bildirib.

İlqar Vəlizadə Polşada “Patriot” sistemlərinin cəmləşdirilməsini də ABŞ ilə artan hərbi-texniki əməkdaşlıq kontekstində qiymətləndirir:

“Polşa ABŞ-dən ən çox silah tədarük edən Avropa ölkələrindən biridir. Hazırkı hərbi kontraktların dəyəri təxminən 70 milyard dollardır. Perspektiv müqavilələri də nəzərə alsaq, bu rəqəm 170 milyard dollardan çox ola bilər. Burada həm hərbi-siyasi, həm də iqtisadi maraqlar var”.