Lukaşenko Belarusa gətirdiyi nüvə silahlarının sayını açıqladı | Xəbərdarlıq edildi

“Belarusun nüvə silahı var”.

Bu sözləri Belarus Prezidenti Aleksandr Lukaşenko deyib.

“Mən ölkəyə nüvə başlıqları gətirdim, onların sayı bir deyil, düz 10 ədəddir”, – deyə A.Lukaşenko nüvə silahı olmayan, lakin böyük gücə malik olan Rusiyanın “Oreşnik” raket kompleksinin Belarusda yerləşdirilməsi ilə bağlı suala cavab verərkən bildirib.

“Nüvə silahından istifadə etmək böyük məsuliyyətdir. Ən azı Xirosima və Naqasakidən sonra heç kim nüvə silahının düyməsini sıxmayıb. Mən bütün düşmənlərimi və rəqiblərimi xəbərdar etdim: əgər dövlət sərhədinə addım atsanız, cavab dərhal veriləcək. Mən baxmayacağam, nüvə silahıdır, yoxsa başqa bir şey”, – deyən Prezident qeyd edib ki, ölkədə “Oreşnik” kompleksinin yerləşdirilməsi üçün 30 meydança var. A.Lukaşenkonun sözlərinə görə, bu, Qərb siyasətçilərinin addımlarına cavabdır.