Maduronun hakimiyyətdə qalması Venesuelada vəziyyəti gərginləşdirir | Trampdan hədə dolu çıxış

ABŞ Prezidenti Donald Tramp Venesuela lideri Nikolas Maduronu vəzifəsini tərk etmədiyi təqdirdə Vaşinqtonun güc tətbiqi də daxil olmaqla digər variantları nəzərdən keçirə biləcəyi barədə xəbərdar edib.

“The Wall Street Journal”ın iddiasına görə, Ağ Ev Administrasiyası N.Maduronu legitim lider saymır. ABŞ rəhbərliyi onun hakimiyyətdə qalmasının Venesuelada vəziyyəti daha da gərginləşdirdiyini bildirir.

D.Tramp daha əvvəl Vaşinqtonun quruda Venesueladan gələn narkotik ticarəti ilə mübarizəyə başlayacağını söyləyib, lakin mümkün hərbi əməliyyatlar barədə ətraflı məlumat verməyib.

Venesuela isə ABŞ-nin ölkənin hava məkanına dair davranışlarını kəskin tənqid edərək Vaşinqtonu beynəlxalq hüquqa əməl etməyə çağırıb. Bu barədə ölkə hökuməti bəyanat yayıb.

Karakas ABŞ Prezidenti Donald Trampın açıqlamalarında güc tətbiqi hədələrini və ölkənin suverenliyinə, ərazi bütövlüyünə və aviasiya təhlükəsizliyinə risk gördüyünü bildirib.

Venesuela hökuməti beynəlxalq ictimaiyyətə, dünyanın suveren dövlətlərinə, eləcə də BMT və müvafiq çoxtərəfli qurumlara müraciət edərək ABŞ-nin bu addımını qəti şəkildə pisləməyə çağırıb.

Qeyd edək ki, Amerika mediası ABŞ-nin tezliklə Venesuela ərazisinə zərbələr endirə biləcəyi barədə məlumat yayıb.