Makronun reytinqi antirekordu yenilədi | Sorğunun dəhşətli statistikası açıqlandı

Fransa Prezidenti Emmanuel Makronun reytinqi antirekord yeniləyib. Hazırda ölkə əhalisinin yalnız 17%-i onu dəstəkləyir.

Bu barədə “Le Figaro Magazine” jurnalı aparılan araşdırmanın nəticəsinə istinadən məlumat yayıb.

Qeyd olunur ki, Fransa liderinin bu dəstək səviyyəsi 2017-ci ildə seçildiyi vaxtdan bəri ən aşağı göstəricidir.

Nəşr belə nəticəyə gəlir ki, bu göstəricilərə Makronun iyunda elan etdiyi parlamentin buraxılması səbəb olub.

“İyunun 9-da nazirlər kabinetinin buraxılmasının nəticələri zəlzələyə bənzəyir. Afterşoklar bir neçə ay sonra hiss olundu. Ən böyüyü Prezidentə olan etimad reytinqinin təsirli düşməsi ilə bağlıdır”, – deyə qeyd olunub.

Fransızlar arasında sorğu göstərib ki, Prezidentin populyarlığı 1 ay ərzində birdən 5 faiz bənd aşağı düşüb.

“17% – bu, sarı jiletlər böhranının kritik anından da aşağıdır. Sorğuda iştirak edənlərin daha 78%-i Prezidentin fəaliyyətindən narazı olduqlarını bildiriblər”, – deyə məlumatda bildirilib.