Maqdeburqdakı hücumdan sonra xalq etiraza qalxdı | Almaniyada vəziyyət gərginləşdi

Almaniyanın Maqdeburq şəhərində Milad bazarında baş verən hücumdan sonra ifrat sağçı fəalların etiraz aksiyası başlayıb.

Etirazçılar əllərində şüarlar yazılmış plakatlar tutub və miqrantların kütləvi surətdə deportasiyasına dair çağırışlar ediblər.

Bu arada Almaniya Kansleri Olaf Şolts Milad bazarında törədilən terror aktından sonra Maqdeburqa səfər edib. Səfər zamanı əhali Kansleri fitə basıb. Bununla yanaşı, insanlar O.Şoltsun ünvanına "Rədd ol!" çağırışları səsləndiriblər.

Qeyd edək ki, dekabrın 20-də Maqdeburqda sürücü avtomobili insanların üzərinə sürüb. Hadisə zamanı azı 5 nəfər ölüb, 205 nəfər isə yaralanıb. Hücumla bağlı 50 yaşlı Taleb əl-Əbdülmöhsün adlı şəxs saxlanılıb.

Almaniyanın daxili işlər naziri Nensi Fesser Maqdeburqda törədilən terror aktı qurbanlarına görə matəm elan edib. Hakimiyyət orqanlarının bütün binalarında bayraqlar endirilib.