Medvedev hansı prezidenti axmaq adlandırdı? - Hamısının arxasında dayanan...

Rusiya Təhlükəsizlik Şurasının sədr müavini Dmitri Medvedev Fransa lideri Emmanuel Makronu hökumət böhranının öhdəsindən gələ bilməyən və prezident postundan getməli olan zəif idarəçi adlandırıb.

Bu barədə rusiyalı siyasətçi öz “Telegram” kanalında paylaşım edib.

O bildirib ki, ABŞ E.Makronu dəstəkləsə də, onun gələcək taleyi məlum deyil.

D.Medvedevin iddialarına görə, postunu tərk etməli olan prezidentlər siyahısında Cənubi Koreya Prezidenti Yun Sok Yol da var.

“O da istefa verməlidir, satqındır. Onu da ABŞ dəstəkləyirdi. Yolun gələcək taleyi məlum deyil”, – deyə qeyd edən Rusiya Təhlükəsizlik Şurasının sədr müavini Gürcüstan Prezidenti Salome Zurabişvilini isə axmaq adlandıraraq istefaya səsləyib. Bildirib ki, o, səlahiyyətləri başa çatdıqdan sonra getməlidir, lakin bunu etmək istəmir.

“Vaxtı keçmiş qeyri-legitim prezident Volodimir Zelenski də Ukrayna prezidenti postunu tərk etməli və ümumiyyətlə yox olmalıdır. O da ABŞ-nin dəstəklədiyi cinayətkarlardandır. V.Zelenskinin də taleyinin necə olacağı məlum deyil”, – deyə D.Medvedev vurğulayıb.

Qeyd edək ki, Dmitri Medvedevin “uğursuz” adlandırdığı prezidentlərin hamısı ABŞ tərəfindən dəstəklənənlərdir.