Medvedev Ukraynaya ayrılan çoxillik hərbi yardım proqramından narahatdır
Rusiya Federasiyası Təhlükəsizlik Şurasının sədr müavini Dmitri Medvedev Şimali Atlantika Müqaviləsi Təşkilatının Kiyevə hərbi yardımı artırmaq planının mövcud vəziyyəti daha da gərginləşdirəcəyini bəyan edib. Bu barədə o, “Telegram” kanalında yazıb.
İyulun 11-də NATO-nun Vilnüs sammitində müzakirə olunan mövzulara münasibət bildirən Medvedev hazırkı durumun Üçüncü Dünya müharibəsinə doğru getdiyini deyib.
Onun sözlərinə görə, Ukraynanı ümumiyyətlə heç vaxt NATO-ya qəbul etməyə də bilərlər, sadəcə olaraq, alyans ölkələri bunu ucadan deməyə qorxur.
Dmitri Medvedev xatırladıb ki, Rusiyanın həyata keçirdiyi hərbi əməliyyatların məqsədlərindən biri də Kiyevin NATO-ya qoşulmasının qarşısını almaq olub və rəsmi Moskva bu iddiasından hələ də əl çəkməyib.
Qeyd edək ki, NATO-nun baş katibi Yens Stoltenberq sammitdə çıxışı zamanı Ukraynaya çoxillik hərbi yardım proqramının artıq təsdiq edildiyini açıqlayıb.
![icon](/images/loading.png)