Memorandum tam icra olunarsa, regionda yeni şərait yaranacaq

"ABŞ ilə İran arasında razılaşdırılan memorandumun bütün bəndləri düzgün şəkildə icra olunarsa, Tehran regionda yeni şərait yarada bilər".

İran Prezidenti Məsud Pezeşkian belə deyib.

O əlavə edib ki, memorandumun təfərrüatları münasib vaxtda açıqlanacaq.

Pakistanın xarici işlər naziri Məhəmməd İshaq Dar da məsələyə münasibət bildirib. O qeyd edib ki, İslamabad ABŞ və İran arasındakı münaqişənin həllində irəliləyişi möhkəmləndirməyə yönələn istənilən səyləri dəstəkləməyə hazırdır.

"Pakistan ABŞ ilə İran arasında əldə edilən anlaşmanı səmimi qəlbdən alqışlayır. Həll olunmuş məsələlər üzrə danışıqlar davam etdiyi üçün Pakistan bu irəliləyişi möhkəmləndirmək məqsədilə bütün səyləri dəstəkləməyə hazırdır", – deyə İshaq Dar vurğulayıb.

Pakistanlı nazir tərəflər arasında əldə edilən razılaşmaların beynəlxalq ictimaiyyətə ümidverici bir siqnal göndərdiyini və qlobal iqtisadi sabitliyə töhfə verdiyini xatırladıb.

"ABŞ və İran arasında qarşılıqlı anlaşmanın əldə edilməsi diplomatiya və sağlam düşüncənin qələbəsidir". Bu barədə isə Oman Sultanlığının xarici işlər naziri Bədr Əlbusaidi açıqlama verib.

"Bütün beynəlxalq ictimaiyyət İran və ABŞ arasında anlaşma memorandumunu alqışlamalıdır. Bunun mümkün olmasına kömək edən hər kəsə böyük təşəkkürümü bildirirəm. Bu, diplomatiya və sağlam düşüncənin vaxtında qazandığı qələbədir", – deyə o sonda bildirib.

Qeyd edək ki, İran və ABŞ arasında anlaşma memorandumu layihəsi 14 maddədən ibarətdir.