Mən illərdir bu məsələ üzərində işləyirəm... | Blekberndən sensasiyalı açıqlama

Donald Trampın Ağ Evə qayıdışı ictimaiyyətə Cefri Epşteynin çoxdan gözlənilən “qara kitab”ı ilə tanış olmaq imkanı verə bilər.

Çünki mərhum maliyyəçi və insan alverində ittiham olunan C.Epşteyn haqqında suallar Nyu-Yorkdakı federal həbsxanada şübhəli şəkildə ölü tapılmasından illər sonra da ortaya çıxmağa davam edir.

Bu barədə “Fox News” kanalı maraqlı məlumat yayıb.

Tennessi ştatından olan respublikaçı senator Marşa Blekbern hökuməti uzun müddətdir C.Epşteyn və onun mümkün şəriklərinə qarşı daha çox sübutu açıqlamağa çağırır. O bu məsələni cümə axşamı Senatda keçirilən dinləmələr zamanı D.Trampın Federal Təhqiqatlar Bürosunun (FBI) direktoru vəzifəsinə namizədi Keş Patel qarşısında qaldırıb.

“Mən illərdir bu məsələ üzərində işləyirəm. C.Epşteynin təyyarəsində kimlərin uçduğunu və ona beynəlxalq insan alveri və cinsi istismar şəbəkəsini qurmağa kimin kömək etdiyini öyrənməyə çalışıram”, – deyə M.Blekbern bildirib.

Onun sözlərinə görə, senator Dik Durbinin bu informasiyanı araşdırması üçün keçmiş cəhdləri nəticəsiz qalıb və FBI-ın keçmiş direktoru Kristofer Rey həmin məlumatları təqdim etməkdən imtina edib.

Xatırladaq ki, Cefri Epşteyn 2019-cu ilin avqustunda Nyu-Yorkdakı federal həbsxanada məhkəməsini gözləyərkən intihar edib. O, onlarla qıza qarşı cinsi zorakılıqda ittiham olunurdu. C.Epşteynin “qara siyahı”sında bir çox məşhurların, o cümlədən Demokrat Partiyasından olan siyasətçilərin adı keçdiyi söylənilir.