MERCOSUR sazişinə qarşı etirazlar davam edir

İspaniyanın paytaxtı Madriddə fermerlər və onların tərəfdarları Avropa İttifaqının aqrar siyasətinə və MERCOSUR ölkələri ilə planlaşdırılan ticarət sazişinə qarşı kütləvi etiraz aksiyası keçiriblər.

Aksiya zamanı nümayişçilər “No Mercosur”, “Ərzaq təhlükəsizliyi” və “Fermerlərsiz Madrid ac qalar” şüarları səsləndirərək plakatlar qaldırıblar. Bəzi yollar traktorlarla bağlanıb. Etirazçılar çıxışlar edərək razılaşmanın yerli istehsalçılara və istehlakçılara mənfi təsir göstərə biləcəyini bildiriblər.

Fermerlər MERCOSUR sazişinin Avropa İttifaqına üzv ölkələrdə qadağan olunan bəzi istehsal standartlarına malik məhsulların bazara daxil olmasına şərait yarada biləcəyindən narahat olduqlarını vurğulayıblar. Onların sözlərinə görə, bu, həm məhsul keyfiyyətinə, həm də yerli istehsalçıların rəqabət qabiliyyətinə ciddi zərbə vura bilər.

Aksiya çərçivəsində iştirakçılara yerli məhsullarla hazırlanmış ənənəvi İspan yeməyi – fabada təqdim olunub. Təşkilatçılar bunun yerli kənd təsərrüfatı sektoruna dəstək mesajı daşıdığını bildiriblər.