Meşə yanğınları üç dəfəyədək arta bilər

İqlim dəyişmələri 2100-cü ilə qədər Avropada meşə yanğınlarının il ərzində əhatə etdiyi ərazini üç dəfəyədək artıra bilər.

Bu barədə Potsdam İqlim Təsirləri Araşdırmaları İnstitutunun alimlərinin apardıqları beynəlxalq tədqiqatın nəticələrində qeyd olunub.

Artım qlobal istiləşmənin miqyasından asılı olaraq 39-192 faiz arasında dəyişə bilər. Qlobal temperaturun əsrin sonunda təxminən 1,8 dərəcə yüksələcəyi ssenarisində Avropada yanğınların əhatə etdiyi ərazi 39 faiz artacaq.

Temperatur artımı 3,6 dərəcəyə çatarsa, bu göstəricinin 192 faiz yüksələcəyi, yəni yanğın sahəsinin təxminən üç dəfə artacağı proqnozlaşdırılır.

Tədqiqatçılar bildirirlər ki, əsas amil iqlim dəyişmələridir. İsti, quru və küləkli hava şəraitinin güclənməsi qitə miqyasında yanğınların aktivliyini artırır. Bu amilin Mərkəzi və Qərbi Avropa, eləcə də Aralıq dənizi regionuna daha çox təsir edəcəyi gözlənilir.

Araşdırmada torpaqdan istifadə, yanğınların qarşısının alınması və erkən aşkarlanması kimi amillərin də mühüm rol oynadığı vurğulanır.