Miqrantlara bəd xəbər | Rusiya sərt qərar verdi

2025-ci ildən Rusiyanın Moskva vilayətində bəzi sahələrdə miqrantların işləməsinə məhdudiyyət qoyulacaq.

Bu mövzu Moskva vilayətinin qubernatoru Andrey Vorobyovun region və bələdiyyə rəhbərləri ilə görüşündə müzakirə edilib.

Moskva vilayəti hökumətinin sədr müavini Nataliya Maslenkinanın sözlərinə görə, regionda üç il ərzində ticarət sahəsində xarici işçi qüvvəsi ilə bağlı şikayətlərin sayı artıb.

Bildirilib ki, hazırda vilayətdə spirtli içki və siqaret satışı ilə məşğul olan pərakəndə mağazalara xarici işçi qüvvəsinin cəlb edilməsində məhdudiyyətlər mövcuddur.

N.Maslenkina bununla yanaşı, miqrantların küçələrdə yemək satışı, idman, məşğulluq, istirahət, səhiyyə, sosial xidmətlər və təhsil kimi sosial istiqamətlər üzrə işləməsini məhdudlaşdırmağı da təklif edib.

Xatırladaq ki, bir müddət öncə ölkənin Təhlükəsizlik Şurasının sədr müavini Dmitri Medvedev miqrantların yalnız mövsümi iş üçün gəldikləri təqdirdə ailələrini Rusiyaya gətirmələrini qadağan etməyi təklif etmişdi.