Miqrantlarla bağlı qalmaqal | Tramp dost-düşmən saymadan hərəkətə keçdi

ABŞ Prezidenti Donald Trampın administrasiyası bu həftə ölkədə qeyri-qanuni yaşayan minlərlə miqrantı Quantanamo hərbi bazasına köçürməyə başlayacaq.

Bu barədə "The Washington Post" qəzeti mənbələrə istinadən məlumat yayıb.

“Məcburi deportasiya üçün nəzərdən keçirilən xarici vətəndaşlar müxtəlif ölkələrdəndir. Onların arasında dost Avropa dövlətlərinin, xüsusilə Böyük Britaniya, İtaliya, Fransa, Almaniya, İrlandiya, Belçika, Niderland, Litva, Polşa, Türkiyə və Ukraynanın yüzlərlə vətəndaşı, eləcə də dünyanın digər bölgələrindən, o cümlədən Haitidən olan çoxsaylı şəxslər var”, – deyə məlumatda qeyd olunur.

Qəzetin mənbələrinin bildirdiyinə görə, Tramp administrasiyası deportasiyaya məruz qalacaq şəxslərin mənsub olduğu ölkələrin hökumətlərini bu barədə məlumatlandırmayacaq.

Hazırda Quantanamoya göndərilmək üçün 9000 nəfərə tibbi müayinələr keçirilir. Məqsəd onların səhhətinin səfər üçün yetərli olub-olmadığını müəyyənləşdirməkdir.