Misirdə IV əsrə aid yaşayış məhəllələri aşkarlanıb

Arxeoloqlar Misirin Qərb səhrasında Bizans dövrünə aid, yaxşı qorunub saxlanılmış qədim şəhər aşkar ediblər.

"The Guardian" xəbər verir ki, Daxla vahəsində aparılan qazıntılar zamanı IV əsrə aid yaşayış məhəllələri, bazilika, iki gözətçi qülləsi, müdafiə divarları, həmçinin qəbul zalları və tağvari damları olan yaşayış evləri üzə çıxarılıb.

Arxeoloqlar həmçinin çörək bişirmək üçün sobalar, mətbəx qabları, dən üyütmək üçün alətlər, Roma imperatoru II Konstansinin hakimiyyəti dövrünə aid tunc və qızıl sikkələr, eləcə də üzərində ticarət müqavilələri də daxil olmaqla müxtəlif mətnlər yazılmış 200-ə yaxın keramika parçası aşkar ediblər.

Bundan başqa, Marina əl-Alameyn arxeoloji abidəsi ərazisində 18 qədim məzar tapılıb. Tapıntılar arasında içərisində insan qalıqları olan 2.5 metr uzunluğunda qranit sarkofaq, sfinksi təsvir edən gips heykəl və həmin dövrün dəfn ənənələrinə uyğun olaraq ölülərin ağzına yerləşdirilmiş qızıl sikkələr də var.