Misirli dizaynerdan gənclərə örnək addım | 10 illik zəhmətin bəhrəsi

Misirli optika dizayneri Muxtar Məhəmməd Abd əl-Fəttah Nil çayı sahilində yerləşən fabrikində teleskoplar və linzalar hazırlayır.

O, fəxrlə bildirib ki, “Misirdə istehsal olunur” etiketi ilə teleskoplar istehsal edir.

Qeyd edək ki, Abd əl-Fəttah 1995-ci ildə “Voyager Optics Technology” şirkətini qurub.

Onun fikrincə, bu fabrik Misir və Yaxın Şərqdə teleskoplar üzrə ixtisaslaşmış yeganə müəssisədir.

O, Misirin yerli bazarındakı boşluğu doldurmaq məqsədilə Almaniya, İtaliya, İsveçdə təlim və təcrübə keçib. Onilliklər ərzində xaricdə təhsil aldıqdan sonra Abd əl-Fəttah Misirə qayıdıb və öz fabrikini qurub.

Misirdə teleskop istehsalı sənayesi olmayıb. Ona görə də Abd əl-Fəttah ilk olaraq teleskop gövdələrini istehsal edib. Zaman keçdikcə istehsal xətti genişləndirilib. Hazırda özünün dediyi kimi, teleskop və digər optik cihazları A-dan Z-yə qədər istehsal etmək imkanı var.

Tələbat artdıqca Abd əl-Fəttahın optika sahəsində heç bir təcrübəsi olmayan komandasının üzvləri teleskoplar üzrə ixtisaslı kadrlara çevriliblər.

İstehsalatla yanaşı, Abd əl-Fəttah həvəskarlar üçün sertifikatlaşdırılmış təhsil mərkəzləri yaradıb. Həmçinin fabrikin yaxınlığında optik texnologiyaların tarixini və inkişafını əks etdirən yüzlərlə kamera, mikroskop və teleskopları nümayiş etdirən qalereya açıb.