Molla rejiminin sonu yaxınlaşır? - "Dünyadan pul qoparır, öz xalqını öldürür" - Baku TV

“Yanvarda keçirilən etirazlar zamanı 40 min iranlı ABŞ və İran arasında nüvə müqaviləsi və ya Hörmüz boğazı ilə bağlı danışıqların aparılması naminə öldürülməyib”.

Bunu İranın sonuncu şahı Məhəmməd Rza Pəhləvinin oğlu Rza Pəhləvi deyib.

Şahın oğlu İran xalqının azadlıq və demokratiya uğrunda canını qurban versə də, danışıqlarda iştirak etmədiyini bildirib.

Rza Pəhləvi ölkədəki edam dalğasına da toxunub: “İslam Respublikası danışıqlara davam edərkən vətəndaşlarını öldürməyə davam edir”.

Şahzadə vurğulayıb ki, İranın gələcəyi ilə bağlı istənilən dialoq xalqın tələblərini diqqət mərkəzinə qoymalı və yalnız nüvə məsələsi və ya Hörmüz boğazında təhlükəsiz keçid kimi məsələlərlə məhdudlaşmamalıdır.

Pəhləvi İranla istənilən razılaşmanın uğursuz olacağını, molla rejimi ilə anlaşmanın səhv olduğunu və əks nəticə verəcəyini qeyd edib:

“Bu rejimlə hansısa razılaşma uğursuz olacaq, ona heç vaxt etibar etmək olmaz. Bu rejim dünyadan pul qoparmağa, cəsur və günahsız iranlıları boğmağa, regionda və beynəlxalq səviyyədə terror və qeyri-sabitlik yaymağa davam edəcək. Ona görə də beynəlxalq birlik İran xalqının azadlıq uğrunda mübarizəsini dəstəkləməlidir. İran xalqı danışıqların mərkəzində və rejimə qarşı siyasətdə yer almalıdır. Yanvarda iki gün ərzində 40 min etirazçını öldürən bir rejimlə razılaşma mənəvi və strateji cəhətdən səhvdir. Bu, əks-təsir göstərəcək. Beynəlxalq dəstək olsa da, olmasa da, bu rejim devriləcək. İran xalqı özünü bu zülmdən azad edəcək”.

Pəhləvi əlavə edib ki, ABŞ və İsrailin hücumları xalq tərəfindən humanitar müdaxilə, azadlıq aktı kimi qəbul edilib, xarici işğal kimi yox: “Rejim dəyişikliyi yeganə düzgün yoldur. Bu rejim azad dünya ilə bacara bilməz”.