Moskva hansı ölkələrə xəbərdarlıq etdi? | Zelenski 9 Mayla bağlı nə açıqladı? - Baku TV

Rusiya Xarici İşlər Nazirliyində akkreditasiyadan keçmiş bütün beynəlxalq təşkilatların nümayəndəliklərinə və xarici diplomatik missiyalara Kiyevdəki heyətlərini əvvəlcədən təxliyə etmək çağırışını əks etdirən xəbərdalıq göndərilib.

Bu barədə Rusiya XİN-in rəsmi nümayəndəsi Mariya Zaxarovanın şərhində bildirilir.

Qeyd olunur ki, 2026-cı il mayın 4-də Rusiyanın Müdafiə Nazirliyi Kiyevin 9 May Qələbə Günündə Moskvaya zərbə endirmək təhdidləri iddiaları ilə bağlı rəsmi bəyanat yayıb. Rusiya XİN nota göndərilən təşkilat rəhbərlərini və ölkə rəsmilərini bu bəyanata məsuliyyətlə yanaşmağa çağırır.

Rusiya Silahlı Qüvvələrinin Kiyevə qaçılmaz cavab zərbəsi endirəcəyi səbəbindən diplomatik və digər nümayəndəliklərin işçilərinin, habelə vətəndaşların Kiyev şəhərindən vaxtında təxliyəsinin təmin edilməsi tələb olunur. Rusiyanın xaricdəki diplomatik nümayəndəlikləri beynəlxalq təşkilatları və akkreditasiya olunduqları ölkələri bu məsələ ilə bağlı məlumatlandırırlar.

Zaxarova qeyd edib ki, mayın 4-də İrəvanda keçirilən "Avropa Siyasi Birliyi"nin Sammiti zamanı Ukrayna Prezidenti Volodimir Zelenski Moskvada Qələbə Gününü pozmaq üçün terror hədəsi ilə çıxış edib. Eyni zamanda, tədbirə bəzi Avropa İttifaqı ölkələrinin nümayəndələri də qatılıb və rəsmi Moskvanın fikrincə, onlar Ukrayna liderinin bu bəyanatlarına heç bir reaksiya verməyiblər.