Moskva İrəvandan nə istəyir? | Zaxarovadan açıqlama

“Mən Ermənistan parlamentinin nümayəndə heyətinin Buçaya səfər etməsi ilə bağlı mesajını görmüşdüm. Yəqin ki, həmin nümayəndə heyətinə Buçada baş verənlərlə bağlı məlumat verilib.

Düşünürəm ki, erməni parlamentarilərdə Kiyevin onlara təqdim etdiyi siyahı var. Hansı ki, həmin sənəddə Buçada öldürülən insanların adı və sözügedən regionda baş verənlərdə Rusiyanı ittiham edən məlumatlar var. Guya onları Rusiya Ordusu öldürüb”.

Bunu Rusiya Xarici İşlər Nazirliyinin (XİN) rəsmi nümayəndəsi Mariya Zaxarova bildirib.

“Biz də ümid edirik ki, İrəvan həmin siyahıda yazılanlarla bağlı məlumatı bizimlə bölüşər. Artıq 2 ildir ki, bu sorğuya cavab verilmir. Biz də istəyirik ki, Ermənistan hökumətindən hansısa səlahiyətli şəxs həmin siyahını Moskvaya təqdim etsin.

Biz həmçinin Avropa ölkələrindən olan nümayəndə heyətlərinin də həmin şəhərə getməsinin şahidi olmuşuq. Lakin onu da qeyd edim ki, biz hazırda onlarla heç bir danışıqlar aparmırıq. Çünki onlardan yaxşı heç nə gözləmirik. Ancaq Ermənistanla əlaqələrimiz var və ümid edirik ki, çox keçmədən həmin insanların siyahısı bizə təqdim edilər”, – o qeyd edib.