Moskva kütləvi hava hücumu altında qaldı | Müharibədə son vəziyyət

Martın 10-dan 11-nə keçən gecə Ukrayna silahlı qüvvələri Rusiyanı kütləvi PUA hücumuna məruz qoyub.

Atılan PUA-lardan 337-si Rusiya hava hücumundan müdafiə qüvvələri tərəfindən zərərsizləşdirilib.

Ölkənin Müdafiə Nazirliyi məlumatı təsdiqləyib. Bildirilib ki, gecədən səhərə qədər paytaxt Moskvaya atılan təyyarə tipli uçuş aparatlarından 91-i vurulub. Bu, 2025-ci ildə baş tutan ən genişmiqyaslı hücumdur.

Bölgə qubernatoru Andrey Vorobyovun sözlərinə görə, Moskva ətrafında PUA hücumu nəticəsində ölənlərin sayı iki nəfərə çatıb. Qubernator bildirib ki, Moskva vilayətindəki üç bələdiyyədə maksimum sayda yaralı və ən böyük ziyan qeydə alınıb. Leninski şəhər dairəsində dronun qalıqlarının düşməsi nəticəsində altı nəfər, o cümlədən bir uşaq xəsarət alıb. Onların həyatı üçün təhlükə yoxdur.

“Baza” teleqram kanalı Moskva vilayətində pilotsuz uçuş aparatlarının hücumundan sonra 20 nəfərin xəsarət aldığı barədə məlumat yayıb.

“Rosaviasiya”dan bildirilib ki, PUA hücumu ilə əlaqədar Moskvanın Şeremyetyevo və Vnukovo hava limanlarının fəaliyyətində fasilə yaranıb. Uçuşların təhlükəsizliyini təmin etmək məqsədilə sözügedən hava limanlarında təyyarələrin gediş-gəlişinə müvəqqəti məhdudiyyət qoyulub .