Moskva Ukraynanı günahlandırdı | Ər-Riyad görüşündən sonra nələr yaşandı?

“Martın 24-də Ər-Riyadda keçirilən ABŞ-Rusiya danışıqlarının yekunu üzrə birgə bəyanat Ukraynanın mövqeyi səbəbindən qəbul edilməyib”.

Bunu Rusiya Federasiyası Şurasının Müdafiə Komitəsinin sədr müavini Vladimir Çijov bildirib.

Onun sözlərinə görə, Rusiya və ABŞ nümayəndə heyətləri Ər-Riyadda keçirilən danışıqların yekunları ilə bağlı birgə bəyanatı razılaşdırıblar:

“Onlar 12 saat oturub və deyəsən, birgə bəyanatı razılaşdırıblar, lakin Ukraynanın mövqeyinə görə bəyanat qəbul olunmayıb. Bu, olduqca xarakterik və simptomatikdir”.

Vladimir Çijov danışıqların konkret məzmunu haqqında məlumat verməyib, təfərrüatların açıqlanmasına qədər gözləməyi təklif edib.

“Belə bir dialoqun baş tutması və iki ölkə prezidentləri arasında telefon danışığı ilə başlanmış Rusiya-Amerika təmasları zəncirinin halqası olması faktının özü müsbət haldır”, − deyə V.Çijov qeyd edib.