Moskvada gərgin müzakirə | Putinin Uitkoffla görüşü beş saat davam etdi - Baku TV

Rusiya lideri Vladimir Putin və ABŞ Prezidentinin xüsusi nümayəndəsi Stiv Uitkoff arasında Ukrayna münaqişəsinin həllinə həsr olunan görüş baş tutub. Görüş təxminən 5 saat davam edib.

Moskvada keçirilən görüşdə Ukraynada sülh planının bir neçə variantı müzakirə olunub.

Bu barədə jurnalistlərə Rusiya Prezidentinin köməkçisi Yuri Uşakov məlumat verib.

O, hələ görüləcək çox işin olduğunu vurğulayaraq sözlərinə belə davam edib:

“Hələlik heç bir kompromis əldə edilməyib. Rusiya və ABŞ liderləri arasında görüş hazırda planlaşdırılmır. Biz konkret ifadələr və həll yolları deyil, mahiyyəti müzakirə etdik. Tərəflər əməkdaşlıq üçün böyük perspektivlər görürlər”.

Y.Uşakov ABŞ-nin Ukrayna ilə bağlı sülh təklifi haqqında da danışıb. Bildirib ki, Rusiya bu təklifdə nə iləsə razılaşmağa hazırdır.

“Təklifdə nələrsə tənqidə səbəb olub. Lakin faydalı müzakirə baş tutdu”, – deyə o söyləyib.

Y.Uşakov qeyd edib ki, Vladimir Putin Donald Trampa S.Uitkoff vasitəsilə salamlarını, eləcə də bir sıra siyasi siqnalları çatdırıb.

O əlavə edib ki, Ukrayna böhranının həlli ilə bağlı ABŞ tərəfindən işlənmiş bəzi materiallar müzakirə edilə bilər.

Y.Uşakovun sözlərinə görə, Rusiya Prezidenti ilə S.Uitkoff arasındakı görüşdə konkret ifadələr deyil, ABŞ sənədlərində qeyd olunanların mahiyyəti müzakirə olunub.