Moskvadakı terrordan sonra Ukraynada vəzifə dəyişiklikləri şübhə yaratdı?

Moskvada baş verən terror aktının ardınca Kiyevə yenidən kütləvi hücumlar fonunda anidən Ukrayna Müdafiə və Təhlükəsizlik Şurasının katibi Oleksiy Danilovun vəzifəsindən azad edilməsi, onun yerinə ölkənin Xarici Kəşfiyyat Xidmətinin rəisi Aleksandr Litvinenkonun təyin edilməsi müzakirələrə səbəb olub.

Ukrayna cəmiyyəti və beynəlxalq ictimaiyyət bunu Kiyevin təhlükəsizliyi daha da gücləndirməyə üstünlük verməsi ilə izah edir.

Politoloq Maksim Yali bildirib ki, Aleksandr Litvinenkonun katib vəzifəsinə təyin olunduğu Milli Təhlükəsizlik və Müdafiə Şurasında baş verən dəyişikliklər bu dövlət qurumunun səmərəliliyinin artırılmasına və müsbət dəyişikliklərə gətirib çıxaracaq:

“Çünki A.Litvinenko əvvəlki vəzifələrində, xüsusən də Ukrayna Xarici Kəşfiyyat Xidmətinin rəhbəri kimi özünü yaxşı göstərib. O, informasiya sahəsində mütəxəssisdir. Bununla bağlı tələbələrin istifadə etdiyi kitablar da yazıb. Buna görə də onun Rusiya dezinformasiyasına və saxta xəbərlərinə qarşı mübarizəsi daha da yaxşılaşmalı, yüksəlməli, keyfiyyətcə yeni səviyyəyə keçməlidir. Prinsipcə, bu da gözlənilir və Ukrayna Prezidenti tərəfindən onun qarşısında məhz belə məqsəd qoyulub”.