Moskvadan İrəvana açıq mesaj | Bu, artıq aktual məsələdir

“Ermənistan Avropa İttifaqı və Avrasiya İqtisadi Birliyi arasında təcili seçim etməlidir, bu, artıq aktual məsələdir”.

Bunu Rusiya xarici işlər naziri Sergey Lavrov KTMT Xarici İşlər Nazirləri Şurasının iclasından sonra deyib.

“Ermənistan Avropa İttifaqına qoşulmaq haqqında qanun qəbul edib, ona görə də məsələ artıq aktualdır”, – deyə Rusiya Xarici İşlər Nazirliyinin rəhbəri qeyd edib.

Sergey Lavrov Rusiya Prezidenti Vladimir Putin və hökumət üzvlərinin Ermənistanın üzvlüyü məsələsinin ən qısa müddətdə həll edilməli olduğu barədə sözlərini xatırladıb.

“Erməni xalqının seçiminə hörmət edirik. Amma bu seçimin də nə olduğunu bilmək istəyirik. Əks halda, Avropa İttifaqına qoşulmaqla bağlı qanun qəbul edən Ermənistanın Avrasiya İqtisadi Birliyində qalması mümkün olmayacaq. Çünki bu iki birliyin normaları bir-birini istisna edir”, – deyə o bildirib.

Lavrov eyni zamanda əlavə edib ki, KTMT-yə üzv dövlətlər Ermənistanın iki ildir üzvlük haqqını ödəməməsi səbəbindən təşkilatın nizamnaməsinin 25-ci maddəsinin tətbiq edilməsini nəzərdən keçirmək barədə razılığa gəlib.

KTMT Nizamnaməsinin 25-ci maddəsinə əsasən, üzv dövlətlər iki il ərzində təşkilatın büdcəsinə olan borclarını ödəmək öhdəliklərini yerinə yetirmədikdə, qurum həmin dövlətin vətəndaşlarının təşkilat daxilində kvota vəzifələrini irəli sürmək hüququnu dayandırmaq, eləcə də borc tam ödənilənə qədər onları təşkilatın orqanlarında səs vermək hüququndan məhrum etmək qərarına gəlir.