Moskvaya qarşı 40 günlük xüsusi əməliyyat planı | Kiyevə sərt zərbələr - Baku TV

Ukrayna Prezidenti Volodimir Zelenski Rusiyanı müharibəni dayandırmağa məcbur etmək məqsədilə Təhlükəsizlik Xidmətinin 40 günlük xüsusi əməliyyat planını təsdiqləyib.

Bu barədə o, "Facebook" hesabında paylaşım edib.

Ukrayna lideri bildirib ki, Təhlükəsizlik Xidmətinin xüsusi təyinatlı "Alfa" Mərkəzinin cəbhədəki fəaliyyəti, uzaqmənzilli və ortamənzilli zərbə planları, eləcə də xidmətin əldə etdiyi nəticələr barədə general-mayor Yevgeni Xmara ona məruzə edib.

"Aqressor dövlətə təsir göstərmək və onu müharibəni dayandırmağa sövq etmək məqsədilə 40 günlük əməliyyatı təsdiqlədim", – deyə Zelenski vurğulayıb.

O həmçinin qeyd edib ki, Təhlükəsizlik Xidməti artıq bir neçə aydır müxtəlif tipli pilotsuz uçuş aparatlarından istifadə etməklə cəbhədə Ukraynanın mövqelərinin müdafiəsində ən yüksək nəticələri nümayiş etdirir.

Bu arada, Rusiya Ordusu Ukraynanın paytaxtı Kiyevə ballistik raketlə hücum edib. Məlumata görə, 5 ballistik raketin hamısı Ukrayna Hava Hücumundan Müdafiə sistemi tərəfindən zərərsizləşdirilib. Raketlərin qalıqları Dnepr çayının sol sahilində boş əraziyə düşüb.