Avropanın müdafiəsi gücləndirilir? – III Çarlzdan Ukraynaya dəstək

Böyük Britaniyanın Kralı III Çarlz Vindzor qəsrində Almaniya Prezidenti Frank-Valter Ştaynmayeri qarşılayarkən London və Berlinin Ukraynanın yanında olduğunu və Rusiyadan gələn yeni təhlükələrə qarşı Avropanın müdafiəsini gücləndirməyə hazır olduqlarını bəyan edib.

Bu barədə "The Guardian" məlumat yayıb.

Dövlət ziyafətində çıxış edən Kral bildirib ki, Böyük Britaniya və Almaniya keçmişdə ən ağır sınaqlardan keçsə də, bu gün iki ölkə ortaq dəyərlər və müasir dünyanın gələcəyinə dair ortaq baxış əsasında strateji tərəfdaşlığı dərinləşdirir.

III Çarlz vurğulayıb ki, iki ölkə birlikdə Ukraynanın yanındadır və Avropanı Rusiyanın yeni təcavüz təhlükəsinə qarşı möhkəmləndirir.

Prezident Ştaynmayer isə çıxışında Londonla münasibətlərin Brexit sonrası çətinliklərdən sonra xeyli yaxşılaşdığını bildirib və Kensington müqaviləsinin iki ölkə arasında təhlükəsizlik, müdafiə və miqrasiya sahələrində əməkdaşlığı gücləndirdiyini vurğulayıb.

Ştaynmayer əlavə edib ki, Berlin və London azad və dinc Avropa uğrunda çiyin-çiyinə çalışır.