Müharibə ssenarisindən xəbərdarıq! - İsrail Livana güclü hücuma hazırlaşır?

İsrail Müdafiə Ordusu Livana cavab hücumu həyata keçirməyi planlaşdırır.

Buna səbəb isə futbol meydançasına atılan və 12-si azyaşlı olmaqla 24 mülki şəxsin ölümü ilə nəticələnən hücuma görə Təl-Əvivin “Hizbullah” hərbi qruplaşmasını günahlandırmasıdır.

Qeyd edək ki, paralel olaraq Livanın cənubuna endirilən zərbələr nəticəsində 2 nəfər həlak olub, 3 nəfər yaralanıb. Hücumların qurbanı olan daha bir nəfər isə Suriya vətəndaşıdır.

Qruplaşma rəsmiləri bu ittihamı rədd etsələr də, İsrail tərəfi insidentə onları cavabdeh hesab edərək, buna görə ağır bədəl ödəməli olduqlarını bildirib.

Ölkənin müdafiə naziri Yoav Qalant Pentaqonun rəhbəri Lloyd Ostinlə telefon danışığı zamanı İsrail Ordusunun ölkənin sərhədlərində təhlükəsizliyi bərpa etmək hüququ və qarşı tərəfə veriləcək cavablarla bağlı müzakirə aparıb.

Xarici medianın yaydığı məlumata görə, ekspertlər sözügedən zərbənin qəsdən endirilmədiyini və qruplaşmanın həmin bölgəni hədəf almadığını açıqlayıblar.

Nəticə etibarilə isə İsrailin bu hadisədən sonra Livana böyük zərbə endirmək ehtimalı qaçılmaz olaraq qalır. Baxmayaraq ki, Təl-Əvivin yüksəksəviyyəli ordu generalları Qəzza ilə müharibə və “Hizbullah”la yaranan qarşıdurma ilə bağlı İsrailin Baş naziri Benyamin Netanyahu ilə eyni fikirdə deyillər. Onlar yeni müharibə istəmədiklərini söyləyiblər.

Rəsmi Vaşinqtonun münasibəti isə təəccüb doğurub. Ağ Evin milli təhlükəsizlik məsələləri üzrə sözçüsü Con Kirbi "Bizim fikrimizcə, regionda eskalasiyaya səbəb olacaq heç bir şey yoxdur” sözlərini bəyan edib:

"Biz Məcdəl Şəmsdə futbol oynayan azyaşlıların ölümünə səbəb olan hücumu pisləyirik. Hücum “Hizbullah” tərəfindən həyata keçirilib. Lakin hələ də diplomatik həll üçün vaxt və məkan olduğuna inanırıq.

Onu da deyim ki, biz müharibə ssenarisindən də xəbərdarıq. Açığı, münaqişə barəsində proqnozların şişirdildiyini düşünürük. Həmçinin bu hücumun dəhşətli olmasına baxmayaraq, regionda hər hansı eskalasiya və ya daha böyük müharibə riski görmürük. İsrailin özünü müdafiə etmək hüququ var. Biz dəfələrlə bunu vurğulamışıq".