Müharibənin aqibətini dəyişəcək hadisə | Rusiya Ordusu indi "Knyaz Poçarski" ilə meydan oxuyur

"Knyaz Poçarski" strateji sualtı qayığı Rusiya Ordusunun sərəncamına verilib.

Rusiya Prezidenti Vladimir Putin təkmilləşdirilmiş 955A "Borey-A" layihəsinə aid olan "Knyaz Poçarski" strateji sualtı qayığı üzərində bayraqqaldırma mərasimində iştirak edib.

Məlumata görə, "Knyaz Poçarski" təkmilləşdirilmiş 955A layihəsinin beşinci, ümumilikdə isə "Borey" ailəsinin səkkizinci atom raketi daşıyan strateji sualtı qayığı olub.

Gəminin təməli 23 dekabr 2016-cı ildə Severodvinskdəki "Sevmaş" ASC-də qoyulub. 2024-cü il fevralın 3-də isə suya buraxılıb.

Əvvəlcə gəminin 2024-cü ilin sonunda Şimal Donanmasının tərkibinə verilməsi planlaşdırılırdı, lakin həmin ilin dekabr ayının əvvəlində təhvil tarixinin 2025-ci ilə keçirildiyi barədə məlumat yayılıb.

955/955A layihəli sualtı qayıqlar bu günə qədər yaradılmış sonuncu – dördüncü nəsil sualtı qayıqlara aiddir. Bu nəsil atom sualtı qayıqları üçüncü nəsillə müqayisədə daha səssiz işləyir ki, bu da onları daha ölümcül edir.

955/955A layihəli qayıqların əsas silahı iki sıra şəklində şaquli şaxtalarda yerləşdirilmiş 16 ədəd R-30 "Bulava" ballistik raketidir.

"Bulava" özü Rusiyanın bərk yanacaqlı ballistik raketidir. Ruslar iddia edirlər ki, bu yeni raket kompleksinin 955 layihəli qayıqlara yerləşdirilməsi Rusiyanın nüvə triadasındakı dəyişmiş qüvvələr balansını bərpa edəcək. Lakin bəzi ekspertlərin fikrincə, dəniz bazalı maye yanacaqlı raketlərin "Bulava" ilə əvəz edilməsi buraxılış çəkisinin azalması səbəbi ilə nüvə çəkindiricilik potensialını azalda bilər.

Qeyd etmək lazımdır ki, "Bulava" raketinin çoxsaylı sınaq buraxılışları uğursuz olmuşdu, baxmayaraq ki, sonradan ruslar bu raketin etibarlılığını müəyyən qədər artırmağa nail olublar.