Müharibənin şiddəti daha da artdı | Donetskdə dəhşətli gecə - Baku TV

Ukraynanın Donetsk vilayətində sakinlərin təxliyəsi zamanı Rusiyanın dron zərbələri nəticəsində bir nəfər həlak olub, daha iki nəfər isə xəsarət alıb.

Bunu şəhər hərbi administrasiyasının rəhbəri Sergey Qorbunov bildirib.

"Konstantinovkada təxliyə missiyası zamanı bir könüllü dron zərbəsi nəticəsində həlak olub. Daha iki nəfər müxtəlif dərəcəli bədən xəsarətləri alıb. Zərərçəkənlər dərhal şəhər xəstəxanasına çatdırılıb və hazırda onlara tibbi yardım göstərilir. Onlar təhlükəli zonalardan insanların çıxarılması ilə məşğul olurdular", – deyə açıqlamada qeyd olunub.

S.Qorbunov əlavə edib ki, hücum nəticəsində "Kramatorsk Könüllülər Birliyi" ictimai təşkilatına məxsus minik avtomobili də zədələnib.

Rusiya Müdafiə Nazirliyi isə dekabrın 25-də Ukraynanın Donetsk vilayətinin Rodynske yaşayış məntəqəsində binaların vurulduğunu əks etdirdiyi bildirilən videogörüntülər yayıb.

Nazirlik həmçinin ölkə qüvvələrinin Donetsk vilayətində yerləşən Svyato-Pokrovske yaşayış məntəqəsini ələ keçirdiyini bildirib.