“Müharibəyə hazır olmasaq, danışıqlar nəticə verməyəcək”

İran hər zaman özünümüdafiəyə hazır olmalıdır. Əks halda, ABŞ ilə hər hansı təmas və ya dialoq nəticəsiz qalacaq.

"Tasnim" agentliyinin verdiyi məlumata görə, bunu İran Məclisinin sədri Məhəmməd Baqir Qalibaf deyib.

Bağdadda səfərdə olan Qalibaf iraqlı həmkarı Hibat əl-Halbusi ilə görüşündə qeyd edib ki, bölgədəki bütün problemlərə və böhranlara görə məsuliyyət daşıyan tərəf ABŞ-dir.

"Bundan əlavə, İngiltərənin bölgəmizdə əkdiyi "İsrail xərçəngi" bölgədəki duruma mənfi təsir göstərir", – deyə Qalibaf bildirib.

ABŞ ilə davam edən münaqişə vəziyyətinə toxunan Qalibaf bildirib ki, hətta bu gün çarəsiz vəziyyətdə olan Amerika müharibədən çəkilərsə, nüfuzunu itirəcək və müharibəni davam etdirərsə, özü üçün onlarla problem yaradacaq.

"Əgər müharibəyə hazır deyiliksə, o zaman danışıqlar nəticəsiz olacaq", – deyə Qalibaf vurğulayıb.