Musiqi tarixində bir ilk | Violonçel çalan robotun konsertindən görüntülər

Violonçel çalan robot musiqi tarixində ilk dəfə simfonik orkestrlə birlikdə çıxış edib.

Robot İsveçdə Malmö Simfonik Orkestri ilə birlikdə bəstəkar Yakob Muhlradın robot üçün yazdığı yeni əsərinin premyerasında ifa edib.

Qolları 3D çap hissələrindən ibarət robot Y.Muhlradın musiqi partiturasına uyğun proqramlaşdırılıb.

Robotu tədqiqatçı və bəstəkar Fredrik Qran dizayn edərək hazırlayıb. Klassik və müasir misiqini sintez etməklə tanınan bəstəkar Y.Muhlrad deyib ki, onun musiqi partiturasının kodlaşdırılaraq sonra robot violonçelə ötürüldüyünü görmək maraqlıdır. O, bu təcrübəni “azad ruh” adlandırıb.

Violonçel ifa edən robotda süni intellektdən (AI) istifadə edilməyib. Amma robot ifaçıda gələcək layihələr üçün süni intellektin tətbiq edilməsi planlaşdırılır. Bununla belə, robot yaradıcıları konsertdə robotların musiqiçilərin imkanlarını məhdudlaşdırması ilə bağlı narahatlıqlarını qəbul etmirlər. Çünki onlar robotların insan musiqiçiləri əvəz edəcəyinə inanmırlar.