NATO ölkələri Rusiyaya qarşı savaşa cəlb olunur? | Lavrov Makronun nüvə hədəsindən danışdı

“Fransa Prezidenti Emmanuel Makronun Moskva ilə qarşıdurma və nüvə silahından istifadə ilə bağlı açıqlamaları Rusiyanın ünvanına təhdiddir”.

Bunu Rusiya xarici işlər naziri Sergey Lavrov bildirib.

Rusiya XİN başçısı onu da qeyd edib ki, Makron Putinə zəng edə bilər, heç kim ona mane olmur.

“Makronun Putinə zəng etmək imkanı var, Rusiyanın Avropaya qarşı müharibə hazırlaması ilə bağlı ittihamlar cəfəngiyyatdır”, – deyə S.Lavrov bildirib.

Onun sözlərinə görə, təcavüzkar tərzdə Napoleonun işini davam etdirən Makron öz həqiqi niyyətini gizlədir.

Xarici işlər naziri əlavə edib ki, Moskva Avropa sülhməramlılarının Ukraynaya göndərilməsi məsələsində güzəştə yer görmür.

S.Lavrov deyib ki, Rusiya Ukraynada avropalı sülhməramlıların olmasına NATO-nun mövcudluğu kimi baxacaq:

“Avropalı sülhməramlıların Ukraynaya göndərilməsi NATO ölkələrinin Rusiyaya qarşı müharibəyə rəsmi cəlb olunmasıdır. Bu, NATO ölkələrinin Rusiya Federasiyasına qarşı müharibəyə rəsmi, ört-basdır edilmədən cəlb olunması deməkdir”.

Qeyd edək ki, Emmanuel Makron Rusiya təhlükəsi ilə əlaqədar Avropa ölkələrini Fransanın nüvə çətirinin altına qəbul edilməsi imkanları ilə bağlı müttəfiqləri ilə müzakirələrə başlayacağını bildirib.