NATO rəsmisi Rusiyanın müttəfiqlər üzərində təzyiq yaratmaq niyyətində olduğunu deyib

"Rusiyanın Avropadakı fəaliyyətinin məqsədlərindən biri Ukraynaya dəstəyi davam etdirən müttəfiqlərin iradəsini zəiflətməkdir".

Bunu NATO-nun Avropadakı Müttəfiq Qüvvələrinin Ali Komandanı Aleksus Qrinkeviç deyib.

Qrinkeviç Avropa İttifaqı deputatlarına açıqlamasında bildirib ki, Avropa ölkələri Rusiyaya aid edilən təxribat və digər sabitliyi pozan fəaliyyətlərə qarşı daha açıq mövqe nümayiş etdirməlidir.

Onun sözlərinə görə, belə hücumların arxasında Rusiyanın dayandığına dair əminlik olduqda bunu ictimaiyyətə açıqlamaq həmin fəaliyyətlərin qarşısının alınmasına kömək edə bilər.

Qrinkeviç sentyabrın 11-də fəaliyyətə başlayan "Eastern Sentry" missiyasının artıq müəyyən nəticələr verdiyini də qeyd edib.

Belə ki, missiyanın fəaliyyətə başlamasından sonra Rusiya Baltikyanı ölkələrin və Polşanın hava məkanına dronlarla daxil olmaq məsələsində daha ehtiyatlı davranır.