NATO Rusiya ilə müharibəyə hazırlaşır? - Baş katibdən həyəcan təbili

“Rusiya bütün NATO ölkələrindən daha çox silah-sursat istehsal edir və onlar bunu sürətlə həyata keçirir”.

Bunu NATO-nun baş katibi Mark Rutte bildirib.

O qeyd edib ki, Rusiya Çin, Şimali Koreya və İranla birlikdə hərəkət edərək hərbi potensialını və imkanlarını bir qədər də artırıb:

“Rusiya ordusunu Çin texnologiyası ilə yenidən qurur və gözlədiyimizdən çox sürətlə silah istehsal edir. Sursat baxımından Rusiya NATO-nun bir ildə istehsal etdiyini 3 ayda istehsal edir. Bu il 1500 tank, 3000 zirehli maşın və 200 "İsgəndər" raketi istehsal edəcəyi gözlənilir. Rusiya beş il ərzində NATO-ya qarşı hərbi güc tətbiq etməyə hazır ola bilər”.

“Artıq Şərq və ya Qərb yoxdur, yalnız NATO var” deyən alyansın baş katibi sonda vurğulayıb ki, Rusiyanın istehsal etdiyi yeni nəsil raketlər səs sürətindən qat-qat yüksək sürətlə hərəkət edir. Onun sözlərinə görə, bunun özü artıq həyacan təbilini çalmağa kifayətdir.