Neft emalı zavodları vuruldu! | Ukraynadan Rusiyaya sarsıdıcı zərbənin detalları

Ukrayna Baş Qərargahı Rusiyada iki neft emalı zavoduna zərbə endirildiyini açıqlayıb.

Bu barədə qurumun mətbuat xidməti sosial şəbəkələrdə məlumat yayıb.

Məlumata görə, avqustun 30-na keçən gecə Ukrayna pilotsuz uçuş aparatları Krasnodar şəhərindəki Krasnodar Neft Emalı Zavoduna və Rusiyanın Samara vilayətindəki Sızran Neft Emalı Zavoduna zərbə endirib.

Baş Qərargahın məlumatında qeyd olunub ki, əməliyyat düşmənin hücum potensialını azaltmaq və hərbi hissələrə yanacaq təchizatını çətinləşdirmək məqsədilə həyata keçirilib. PUA-ların zavodlara vurduğu ziyanın miqyası dəqiqləşdirilir.

Baş Qərargahın məlumatında həmçinin vurğulanıb ki, Sızran Neft Emalı Zavodunun ərazisində yanğın müşahidə olunur.

Rusiya Ordusu isə Ukrayna ərazisini PUA və raketlərdən kütləvi şəkildə atəşə tutub. Zaporojye vilayətində gecə hücumları nəticəsində 1 nəfər ölüb, 22 nəfər yaralanıb. Xəsarət alanlar arasında üç uşaq da var.

Hücumlar nəticəsində 14 yaşayış binasına və 40-dan çox fərdi yaşayış evinə ziyan dəyib. Onların işıq və qaz təminatı kəsilib.