Netanyahunun planı puç oldu | “Böyük İsrail”, yoxsa Fələstin dövləti yaradılacaq?

ABŞ Prezidenti Donald Tramp İsrailin İordan çayının qərb sahilinin ilhaqına icazə verməyəcəyini və bunu Benyamin Netanyahu ilə müzakirə etdiyini bildirib.

Əgər Donald Tramp bu məsələ ilə bağlı İsrailə təzyiq edərsə, bu, onun rəhbərliyi dövründə Yaxın Şərq məsələsi ilə bağlı ciddi dönüş nöqtəsi ola bilər.

İordan çayının qərb sahili Fələstin torpaqları sayılır və burada İsrailin yəhudi yaşayış məntəqələri yaratması mübahisə mövzusudur.

Təl-Əvivdə bəzi siyasətçilər İordan çayının qərb sahilinin rəsmi olaraq İsrail ərazisi elan edilməsi siyasətini dəstəkləyirlər. Hazırda hakimiyyətdə olan Benyamin Netenyahunun rəhərlik etdiyi hökumət də bu siyasəti müdafiə edir. Mövcud hökumətin əsas hədəfi İordan çayının qərb sahili, Qüdsün şərq hissəsi və Qəzza zolağını ələ keçirərək Fələstin dövlətinin yaranmasına imkan verməməkdir.

Tramp administrasiyası əvvəl İsrailə qarşı daha yumşaq və dostyana mövqe sərgiləyirdi. Qüdsü İsrailin paytaxtı kimi tanımaq qərarı buna sübutdur. Amma İordan çayının qərb sahilinin ilhaqına icazə verməyəcəyini deyən Tramp gücünü nümayiş etdirir. Burada məqsəd həm ərəb blokunu razı salmaq, həm də yəhudi lobbisinə təsir etməkdir.

Trampın bu bəyanatı Netanyahu hökumətində narahatlıq yarada bilər. ABŞ-dən gələn bu cür açıq təzyiq İsrailin ilhaq planını ya gecikdirə, ya da tamamilə dayandıra bilər.

Digər variant isə ABŞ-İsrail münasibətlərində balansın dəyişməsidir. Ağ Ev rəhbərinin bu açıqlaması şübhəsiz ki, Fələstinin mövqeyini gücləndirir.