Nikol Paşinyan iranlı nümayəndə Əli Əkbər Əhmədianla görüşüb

Ermənistanın Baş naziri Nikol Paşinyan İrəvana səfər edən İranın Milli Təhlükəsizlik üzrə Ali Şurasının katibi Əli Əkbər Əhmədianı qəbul edib.

Yerli medianın yaydığı məlumata görə, Paşinyan Əhmədianla ikitərəfli münasibətlərin dinamik inkişafına dair məsələləri müzakirə edib.

Onlar iki ölkə arasında texnologiya, sənaye, energetika, kənd təsərrüfatı, infrastruktur və digər sahələrdə əməkdaşlıq üçün yeni imkanların olduğuna əminliklərini ifadə ediblər.

Paşinyan “Şimal-Cənub” avtomobil yolunun tikintisində İran tərəfi ilə əməkdaşlığın vacibliyini vurğulayıb. Tərəflər avtomobil yolunun tikintisinin ticarət dövriyyəsinin və yük daşımalarının həcminin artırılmasına da müsbət yöndə təsir göstərəcəyini bəyan ediblər.

Ermənistanın Baş naziri onu da bildirib ki, rəsmi İrəvan istənilən istiqamətdə ikitərəfli əməkdaşlığın inkişafı və genişləndirilməsində maraqlıdır.