Nüvə obyektlərinə zərbələr digər ölkələrə də ziyan vuracaq! - Ən böyük təhlükə isə...

“İrandakı nüvə obyektlərinə zərbələr bir sıra ölkələrin ərzaq təhlükəsizliyinə zərbə vura bilər”.

Bunu “Rosselxoznadzor”un rəhbəri Sergey Dankvert TASS-a deyib.

“Ən böyük təhlükə nüvə obyektlərinə zərbələrdir ki, bu da ərazilərin çirklənməsi ilə nəticələnə bilər. İran böyük həcmdə bitki və heyvandarlıq məhsulları istehsal edir. Ona görə də bu cür zərər ərzaq baxımından ciddi təsir göstərəcək”, ‒ S.Dankvert bildirib.

O vurğulayıb ki, nüvə obyektlərinin zədələnməsi nəticəsində ərazilərdə çirklənmə baş verərsə, Rusiya daxil olan məhsulları radiasiyaya görə yoxlamaq məcburiyyətində qalacaq:

“Heç kim bütün bu hekayəyə humanitar nöqteyi-nəzərdən baxmır. Nədənsə hamı buna yalnız hərbi nöqteyi-nəzərdən baxır. Mən burada həm İranda, həm də yaxın ərazilərdə yetişdirilən məhsulların təhlükəsizliyi baxımından nüvə energetikası obyektlərinə dəyən zərərin nəticələri nöqteyi-nəzərindən daha çox narahatlıq görürəm”.

Qeyd edək ki, Azərbaycan İrandan böyük həcmdə ərzaq məhsulları idxal edir. Dövlət Statistika Komitəsinin məlumatına əsasən, bu ilin yanvar-aprel aylarında İrandan idxal olunan 198 milyon 692 min dollarlıq mal və məhsulların mühüm hissəsini meyvə-tərəvəz, süd və süd məhsulları, qənnadı məmulatları və digər qida məhsulları təşkil edir.