“Ölü” qalaktikalarda ulduzların yaranması niyə dayanıb?

Astronomlar kainatda olduqca qeyri-adi xüsusiyyətlərə malik üç cırtdan qalaktika aşkar ediblər.

Maraqlıdır ki, bu qalaktikalar digər böyük qalaktikalardan uzaqda yerləşsələr də, artıq yeni ulduzlar əmələ gətirmir.

Alimlərin fikrincə, bu vəziyyət gözlənilməzdir. Çünki təcrid olunmuş cırtdan qalaktikaların soyuq qaz ehtiyatlarını qoruyaraq ulduz yaratmağa davam etməsi gözlənilir. Lakin yeni aşkar edilən qalaktikalarda ulduz yaranması, demək olar ki, dayanıb.

Tədqiqatçılar hesab edirlər ki, bu qalaktikalar keçmişdə daha böyük bir qalaktikanın yaxınlığından keçmiş ola bilər. Güclü cazibə qüvvəsi və digər fiziki təsirlər onların ulduz yaratmaq üçün lazım olan qazını alıb daha sonra isə qalaktikalar kosmosun daha uzaq bölgələrinə hərəkət edib.

Belə obyektlər böyük qalaktikaların təsir zonasından çıxaraq uzaqlaşan qalaktikalar adlandırılır. Kəşf qalaktikaların necə inkişaf etdiyini və ulduz əmələ gəlməsinin hansı səbəblərdən dayandığını anlamaq üçün astronomlara yeni imkanlar yaradır.