Orbanla Fon Der Lyayen bir birini nələrdə ittiham etdi? | Detallar açıqlandı

Avropa Parlamentinin Fransadakı iclası zamanı Avropa Komissiyasının sədri Ursula fon der Lyayen ilə Macarıstanın Baş naziri Viktor Orban arasında münaqişə yaranıb. Tərəflər qarşılıqlı ittihamlar səsləndiriblər.

“Bütün dünya Rusiya-Ukrayna müharibəsinin gedişində baş verən hadisələrin şahidi oldu. Bununla belə, hələ də bəziləri zorakılıq edənlə zorakılığa məruz qalanı ayırd edə bilmir. Mən onlardan soruşmaq istəyirəm ki, onlar nə vaxtsa 1956-cı ildə Sovet işğalına görə macarları günahlandıra bilərmi?”, – Ursula fon der Lyayen bildirib.

Viktor Orban isə Komissiya sədrinin sözlərinin onu çox təəccübləndirdiyini söyləyib:

“Onunla Macarıstanın mövqeyi arasında ciddi fərqlərin olduğuna şübhəmiz yoxdur. Çünki biz qurumun rəhbər şəxsləri olaraq işimizi Avropa üçün görürük. Sədrin bu addımı təəssüf doğurur. Fikrimcə, bu, ümumiyyətlə, düzgün deyil. Hörmətli komissiya sədri, mən sizin ittihamlarınızı rədd edirəm. 1956-cı ildə Macarıstanda baş verənlərlə Ukraynadakı hadisələrin müqayisə edilməsi doğru deyil. Bu, macar əsgərlərin xatirəsinə hörmətsizlikdir. Bu 2 situasiya müqayisə edilə bilməz”.

Qeyd edək ki, Viktor Orban Avropa İttifaqını Kremllə əlaqələri bərpa etməyə çağırıb. “Qələbə qazanmaq istəyiriksə, bu məğlubiyyət strategiyasını dəyişməliyik”, – deyə Baş nazir vurğulayıb.