Paris görüşündə hansı nəticələr əldə olundu?

“Parisdə “İstəklilər koalisiyası”nın 15-ci iclasında əhəmiyyətli irəliləyiş əldə olunub”.

Bunu Fransa Prezidenti Emmanuel Makron görüşün yekunları ilə bağlı mətbuat konfransında bildirib.

“Davamlı və dayanıqlı sülh üçün etibarlı təhlükəsizlik zəmanətləri Paris bəyannaməsində öz əksini tapdı. Bəyannamə ilk dəfə olaraq koalisiyaya daxil olan 35 ölkə, Ukrayna və ABŞ arasında etibarlı təhlükəsizlik zəmanətlərinin yaradılması məqsədilə operativ yaxınlaşmanı tanıyır”, – deyə o bildirib.

Böyük Britaniyanın Baş naziri Kir Starmer isə bildirib ki, imzalanmış bəyannamədə Rusiya-Ukrayna müharibəsi başa çatdıqdan sonra Ukraynada çoxmillətli qüvvələrin yerləşdirilməsi nəzərdə tutulur. Onun sözlərinə görə, atəşkəs əldə edildikdən sonra Böyük Britaniya və Fransa Ukraynanın bütün ərazisində hərbi mərkəzlər yaradacaq.